Ekaina 6, 2013

75 film laburrek izango dute Kimuaken 2013ko edizioaren parte izateko aukera

Pasa den ostirala, maiatzaren 31ean itxi zen Kimuaken 2013ko ediziora film laburrak inskribatzeko epea, 75 izan direlarik aurkeztutako lanak.

Eusko Jaurlaritzako Kultura Sailaren –Etxepare Euskal Institutuaren bitartez– Kimuak egitasmoak, Euskadiko Filmategia Fundazioak kudeatua, Euskal Autonomia Erkidegoan zuzendu edo ekoiztutako film laburren sustapena eta banaketa du helburu.

Aurkeztutako lanak aztertu eta epaitzeko, zinema eta ikus-entzunezkoen munduko bost profesional eta adituez osatutako hautespen batzorde independente bat eratu da.

Aurtengo epaimahaia honako kideek osatzen dute: Maialen Beloki –Donostia Zinemaldiko Zuzendaritza eta Hautespen-batzordetako kidea eta Zinemira eta Zinema Ikasleen Nazioarteko Topaketa atalen Arduraduna–, Josemi Beltrán –Donostia Kulturako Zinema Arduraduna–, Lourdes Fernández –AlhóndigaBilbaoko Arte eta Edukien Zuzendaria–, Fernando López de Castillo –Vitoria-Gasteiz Film Officeko arduraduna eta zinema zuzendaria– eta Inguma Martínez –ETBko albistegietako Kultura Arlo-burua–.

Aukeraketa berria astelehena, ekainaren 17an emango da jakitera.